Bericht im Schleswig-Holsteiner Zeitungsverlag vom 04.05.2011

Bericht im Schleswig-Holsteiner Zeitungsverlag
vom 04.05.2011

En räis döört madelåler: Et bök „Friesische Freiheit“

4. Mai 2011 | Von Karin Haug

 

Lothar Englert mååget da üülje tide läämti. Foto: Karin haug

Magnus tom Diek än Keno Hilmerisna biiljke enouder önj. Di ruchter Magnus wal, dåt huum önj Ååstfraschlönj uk widerhaane eefter di üülje schake önj sin åmt kiised wårde schal. Keno wal ouers for sin famiili än for ålem for san saan Ocko, dåt di rikste böre et åmt fäit. Sü köö’r sin måcht behüülje än feriirwe.

Ma dideere strid bai e Up staalsboom fångt et bök „Friesische Freiheit“ foon Lothar Englert önj. Huum as stråks maden bane önjt 14. iirhunert, weer da frasche nuch fri laawe köön. Dåt ham dåt bål anere schölj, wus jare äin düünjs. Ja streeweden maenouder än en arken hååld ham måkere foon büte tu heelp. Bait iinje driif e gemiinschap ütenouder.

Önj sin bök heet Englert ham bili nau bai da histoorische ferhüülje hülen. Trii iir lung heet’r ham önj archiiwe, böke än önjt interneet deerouer klök mååged, hü da maschne for mör 600 iir laawed hääwe, wat ja ätjen än wat for kluuse ja önjhäin. Englert beschraft jüdeer tid sü, dåt huum ham gödj forstale koon, wat da böre jütid toochten än hü ja politiik måågeden. Et madel åler as bai ham niinj junk tid ouers en wråål, weer iinj måcht ma jü ouder streewed. Jüst sü as diling köm et uk jütid deeraw önj, huum da beeste ferbininge häi.

Fort mååst gungt et önjt bök am e famiili tom Brook, weertu uk Keno Hilmerisna hiird. Önj Ååst frasch lönj kånt enarken di noome, wat huum deer t. b. uk aw strooteschilde leese koon. Englert wörd naischäri deer aw, hüdänji jüdeer famiili et schååfed häi har döörtuseeten än önj twasche wiitj’r: „Es waren keine Betschwestern!“

Englert booget önj Aurich än mäi ål sunt sin schöljtid hål schriwe. „Friesische Freiheit“ as ai sin jarst bök, ouers san jarste histoorische romaan. Huum wunert ham mååst, dåt niimens awfoorie ham dåtdeer tääl fornümen heet. Liiwde, måcht än luuwe: Åles steecht deerbane. Gou heet Englert begram, dåt et madel åler bili aktuäl weese koon. Uk deeram as et moto foont bök: „Die gefährlichsten Feinde der Friesen sind die Friesen selbst.“ Da tom Brooks hääwe jam nämlik ai iinjfåch sü döörseet: Ja hääwe hooneld, oudere üt njüted än kreege fjard, weerbai ja uk heelp foon da rööge gååste foon Störtebeker füngen.

Lothar Englert: „Friesische Freiheit“ koostet 15,90 Euro.